प्रधानमन्त्रीको भ्रमणबारे बोल्दै सांसद हमालले भने, ‘प्रधानमन्त्रीज्यू संयुक्त राष्ट्रसङ्घको महासभामा सहभागी हुन जानु अत्यन्त सुखद र महत्त्वपूर्ण कुरा हो। उहाँको पहिलो विदेश भ्रमण नै यस्तो महत्त्वपूर्ण अन्तर्राष्ट्रिय मञ्चबाट सुरु हुनु र त्यसमा जलवायु कूटनीतिलाई प्राथमिकता दिनुले सकारात्मक सन्देश दिएको छ।’ भ्रमणको सफलताको कामना गर्दै उनले थपे, ‘अहिले नेपालले भोगिरहेको विपद् र पीडाको अवस्थामा उहाँको भ्रमणले सार्थक परिणाम ल्याओस् भन्ने शुभकामना व्यक्त गर्न चाहन्छु।’

जलवायु न्यायको अवस्थाबारे प्रस्ट पार्दै उनले भने, ‘नेपालले यो विषय लामो समयदेखि अन्तर्राष्ट्रिय मञ्चमा उठाउँदै आएको छ। तर नेपालले पाउनुपर्ने जलवायु न्याय र वित्तीय सहयोग अझै सहज रूपमा प्राप्त हुन सकेको छैन।’ आगामी रणनीतिका विषयमा जोड दिँदै उनले थपे, ‘त्यसैले अहिलेको नेपाली प्रतिनिधिमण्डलले जलवायु वित्त, क्षति तथा नोक्सानी र अनुकूलनका विषयमा स्पष्ट र प्रभावकारी हस्तक्षेप गर्न आवश्यक छ।’

जलवायु वित्त प्राप्तिका लागि नेपालले अन्तर्राष्ट्रिय वार्ता र कूटनीतिक पहललाई अझ प्रभावकारी बनाउनुपर्ने सांसद हमालले बताए। नेपालभित्र विज्ञ, अनुसन्धान र छलफल भइरहे पनि अन्तर्राष्ट्रिय तहमा नेपालको हस्तक्षेप अपेक्षित रूपमा प्रभावकारी हुन नसकेको उनको भनाइ छ। प्रधानमन्त्री सहभागी हुने उच्चस्तरीय साइडलाइन बैठकहरूमा नेपालका तर्फबाट ठोस प्रस्ताव र प्राथमिकता प्रस्तुत गरिनुपर्नेमा उनले जोड दिएका छन्।